ريهام سعيد ترد على محمد رشاد بعد هجومه عليها
شن الفنان المصري محمد رشاد، نجم برنامج «أراب أيدول»، هجوما حادا على الإعلامية ريهام سعيد بعد تخصيصها فقرة كاملة عنه وعن خطيبته الإعلامية مي، خلال حلقة برنامجها "صبايا"، على قنا "الحياة".
ريهام ردت على هجوم رشاد، عبر حسابها الخاص على موقع "انستجرام"، حيث كتبت: " رد واجب لفنان صاعد، أنا في حالة صدمة من تصريحاتك، الصحافة بتتكلم لمدة 3 أيام ومقررتش ترد غير عليّ، مع إني الوحيدة اللي متكلمتش على سبب الانفصال لأنه خاص بيك".
وأضافت: "مفيش حاجة اسمها حياة شخصية لشخصية عامة، وهي دي الضريبة وبالرغم من علمنا بالموضوع يوم الأحد، ماذعناش حرف، لحد ما الصحافة كلها اتكلمت، ومي دخلت المستشفى، ولحد ما كلمتها مكالمة وقالت هتتكلم عن الموضوع في برنامجي".
وتابعت: "حضرتك قمت بتأليف سيناريو إن أنا قلت إنك اتخليت عنها، ممكن يكون ده إحساسك، لكن أنا مقولتش حاجة شبه كده حتى، أنا قُلت بتمنى إنكم تتصالحوا ولو محصلش يبقى خير ليكم إنتوا الاتنين".
وأضافت: "أنا قُلت إني بتكلم عنها مش عنك، لأن البنت دائما بتتأثر بإلغاء الفرح أكتر من الراجل، أستاذ محمد رشاد الـ 5 دقايق اللي في صبايا، اللي بتمنى فيهم الشفاء لزميلة وبواسيها، مايجوش حاجة جنب الأخبار اللي على المواقع".
واختتمت كلامها بقولها: "متاخدش ريهام سعيد كبش فدا، وركز في مرض خطيبتك وإلغاء زواجك اللي هما أهم بكتير، وللعلم مصادري من أقرب المقربين لمي، وموثقة بصور المحادثات، وأخيرا زي ما قلت في الحلقة اللي إنت ماشفتهاش، بتمنى لكم التوفيق".
وكان محمد رشاد قد وجه رسالة شديدة اللهجة إلى الإعلامية ريهام سعيد، عبر صفحته الشخصية بموقع «إنستجرام»، حيث قال: «الأستاذة الإعلامية الفاضلة، ريهام سعيد.. أولًا اسمي وحياتي الخاصة والعامة لا تعنيكي في شيء، ومسمحش إنك تصوريني في صورة الإنسان المستهتر بمشاعر الإنسانة اللي بحبها أو بينا شيء محترم».
وأضاف: «محصلش بينا نصيب لخلافات خاصة بينا قبل أي حد كائنا من كان، والقرار بخيره أو بشره عائد علينا أولًا وأخيرًا، قدر الله وما شاء فعل، إن لم يشأ لم يكن وإن شاء قد كان».
وتابع: «ثانيًا المصادر الموثوقة اللي قالتلك إن مي جالها جلطة في المخ، موصلتش لحضرتك إنها كانت معايا أثناء عرض الحلقة بتاعتك، بنحاول نوصل لحل يرضي أطراف الخلاف اللي حدث يوم زفافنا، ومكنش ولله الحمد عندها جلطة في المخ بعد الشر عنها، وعن أي شخص معتقدش هتوصلك لأن مصادرك يا أستاذة يا كبيرة ضعيفة».
واستطرد: «مي بالنسبة لي أكبر من كل الكلام الذي يقال، لان بيننا عشرة سنين، شوفنا فيها الحلو والوحش، ولو حضرتك يا أستاذة ريهام كلمة الكرامة لا تعنيلك بشيء فأنا كرامتي وكرامة أهلي تعنيلي جداً وتهمني بعيدًا عن كل المهاترات اللي تم نشرها قبل أيام».
وختم قائلاً: «أنا احتراماً مني للأيام والمشاعر اللي بيني ونين مي لم أتكلم، ولن أتكلم، لأن مي سواء كانت شريكتي في الحياة أو لا بنصيب وقدر الله بتعنيلي كثير جداً».
