نوارة نجم: أمي لم تحضر عزاء أبي لهذا السبب

قالت الكاتبة الصحفية والناشطة السياسية نوارة نجم إن احتفال تسليم جائزة «الأمير كلاوس»، والذي كان والدها الشاعر أحمد فؤاد نجم أحد المكرمين به، سيعقد في موعده اليوم، مشيرة على أن من ستتسلم جائزة والدها هي الاستاذة منى انيس التي ترجمت له اشعاره في كتيب يتحدث عنه.

نوارة قالت: «الحقيقة الاستاذة منى كانت حالتها صعبة قوي، وكان صعب عليها جدا انها تروح لوحدها من غير بابا تتسلم الجائزة، لكن انا وماما الحينا عليها تروح عشان بابا كان فرحان بالجايزة، ولو انه كان حاسس بمرارة وقال مع يوسف الحسيني "مش عيب اني اروح اخر الدنيا اتكرم وبلدي ما تركمنيش؟ لازم اموت يعني عشان يكرموني؟" وده السبب اللي خلا ماما كمان مش قادرة تحضر عزا بابا لانها قالت لي مش حاقدر امد ايدي واسلم على ناس كان نجم قدامهم وما ادولوش جايزة القطن حتى وجايين دلوقت يعزوا فيه».

وتابعت: «بس عموما هو اخد جايزة احسن من جوايز مصر وهولندا والعالم مجمعة، يكفي ان بياعين البخور والسبح وسواقين الميكروباصات والتاكسيات لما عرفوا ان "عم نجم" بيتصلى عليه في سيدنا الحسين سابوا فرشتهم على الارصفة وركنوا عربياتهم واكل عيشهم ودخلوا يصلوا عليه وهم بيعيطوا، وعايزة اقولكوا ان بعد شوية ما بقيناش عارفين مين اللي شايل بابا، الناس في سيدنا الحسين كل لما يعرفوا ان ده بابا يقولوا: عم نجم.. ويجروا عشان يشيلوه، هو كان عايز يتصلى عليه في سيدنا الحسين اللي كان كل ما يعدي عليه يقوله: ازيك يا سيدي وحبيبي، وقال مش عايز غير الفقرا والثوار بس هم اللي يشيلوني، واللي هو عايزه اتحقق له».

واختتمت حديثها -على حسابها الخاص على موقع «الفيس بوك»- بقولها: «بابا قبل ما يروّح لربنا ب24 ساعة قال لام زينب باللفظ: "انا مدبوح اني اتكرم من الغريب وما اتكرمش من بلدي، وفي ناس مستخسرة فيا اني افرح واتكرم، بس انا ضحكت عليهم وفرحت، وربنا رضاني اكتر من اللي كنت باتمناه عشان ربنا ده حبيبي... كده قنعت».