طارق فؤاد يهاجم أغاني ومطربي المهرجانات ويلوم هاني شاكر
شن الفنان المصري طارق فؤاد، هجومًا حادًا على أغاني المهرجانات ومطربيها ، والتي وصفها بأنها تتسبب في حالة هيستريا للشباب.
وقال في حوار صحفي له: "الهجمة شرسة من المهرجانات وزعلان جدًا من هاني شاكر إنه بيبحث لهم عن مخرج علشان يدخلهم النقابة، وهذا لا يصح أبدا، هو ينفع حد يروح النقابة بشورت وحمالات ملونة ويزعق ويقول إدوني العضوية".
وأضاف: "إيه ده دول عيال تافهة أنا لازم أوقفهم وهاني شاكر لازم يوقفهم، ويكون له موقف مش يدور على سكة يدخلهم النقابة، وهاني أنت فى الأول كنت حازم، قلت همنعم ولن أعطيهم تصريح ، كمل موقفك للآخر علشان التاريخ ينصفك، وحتى لا يقال إن فى عهدك طلعتلهم كارنيهات ويتفرضوا علينا، دلوقتي بيعملوا حفلات في الخفاء، وللأسف بيعملوا حفلات في الدول العربية بالملايين".
وقال محذرا: "دي ثقافة أمة طالعة وجيل طالع، هذا الجيل لا يسمع عبدالحليم وأم كلثوم ولا يحبهم، جيل طالع يحط رجله على فرامل العربية والتليفون في شماله، وإيده على الدريكسيون، والمهرجانات والسماعات بتدب، وهو ماشي ومبسوط وبيغني اللي مش فاهمه، والمهرجانات بتعمله حالة من الهيستريا".
واستطرد: "علشان كدة لما بيوقفوا الحوادث الكبيرة بيلاقوا اللي عملوها مشغلين مهرجانات في الميكروباصات والسيارات لأنها بتعمل حالة من السطل والتخدير، دى أغاني مش بتاعتنا واحنا كدة نتخلى عن شرقيتنا".
وتابع: " تلاقي الشباب في مصر من سن 18 حتى 22، وحتى سن 30 طالع بعربية ومشغل مهرجانات إلا من رحم ربي، في ناس اتثقفت واتعلمت وأهلها ربوها كويس"، مؤكدًا أنه لا يوجد شيء اسمه الجمهور عايز كدا.
