شذى عن الحجر المنزلي: إحنا شغالين باليومية

ردت الفنانة المصرية شذى، على الانتقادات التي تعرض لها عدد من النجوم بعد دعوتهم للمواطنين بالحجر المنزلي في حملة "خليك في البيت"، وتوعيتهم بضرورته للحد من انتشار فيروس كورونا.

شذى، قالت في فيديو نشرته عبر صفحتها الشخصية بموقع "إنستجرام": "لقيت هري وهبد على السوشيال ميديا وناس زعلانة إننا بنقول اقعدوا في البيت ويقولوا الفنانين مش حاسين بالناس واصرفوا عليهم.. يا جماعة مش كل الفنانين زي اللي بتشوفوهم بيستعرضوا حاجتهم بدون ذكر أسماء وعندهم كام عربية وكذا فيلا.. لا في فنانين عاديين جدا وأنا منهم الحمد لله".

وأضافت: "مستوايا الاجتماعي كويس بعيدا عن الشغل خالص.. تقريبا مبكسبش من شغلي حاجة فظيعة.. بيتي إيجار عندي التزامات ومصاريف فا إحنا لما بنقول اقعدوا في البيت فا إحنا معاكم على فكرة.. أنتم مش هتقعدوا في البيت وإحنا هننطلق .. علشان خاطر الوباء ده مينتشرش.. فبلاش بقا موضوع ومين هيصرف ومين هيعمل.. ربك اللي بيرزقني وبيرزقك وبيرزق اللي مش لاقي شغل.. وأصلا اللي هينزل يشتغل هيشتغل فين ما هو مش هيلاقي حد يشتغل معاه أو عنده لأن الناس المفروض تقفل ع بعضها".

واختتمت حديثها قائلة: "بوجه كلامي للناس اللي بتكتب تعليقات مستفزة بلاش حكاية وانتوا مش حاسين بالناس لأن إحنا بنشتغل باليوم برضو على فكرة، إحنا لو معندناش حفلة النهاردة ولا فرح بكرا ولا مسلسل ولا فيلم ولا تصوير إحنا مش هنلاقي ناكل فا إحنا زينا زي الأرزقي اللي بيشتغل باليومية".